आदिमाया अंबाबाई
साऱ्या दुनियेची आई
तिच्या एका दर्शनात
कोटी जन्मांची पुण्याई

उदे ग अंबाबाई

साऱ्या चराचरी तीच
जीवा संजीवनी देते
तीच संहारप्रहरी
दैत्य दानव मारीते
उग्रचंडी रूपाआड झरा वात्सल्याचा गाई

क्षेत्र नामवंत एक
नाव कोल्हापूर त्याचे नाव कोल्हापूर
अगणित खांबावरी राहिले मंदिर
उभे राहिले मंदिर
नाना दैवते भोवती
देवी मधोमध राही

तुळजापुरीची भवानी
जणू मूळ आदिशक्ती
घोर आघात प्रहार
तिने पचविले पोटी
स्वतः तरली भक्तांना
स्वये तारूनिया नेई

अमरावतीची देवता शाश्वत अमर
असे शाश्वत अमर
अंबेजोगाईत तिने एक मांडियेले घर
एक मांडियेले घर
मुंबापुरीच्या गर्दीला
दान चैतन्याचे देई

कुणी म्हणती चंडिका
कुणी म्हणती भवानी
दुर्गा दुर्घट यमाई
अंबा असूरमर्दिनी
किती रुपे किती नावे
परि तेज एक बाई