बुगडी माझी सांडली गं जाता साताऱ्याला
चुगली नगा सांगू गं माझ्या म्हाताऱ्याला

माझ्या शेजारी तरूण राहतो
टकमक टकमक मला तो पाहतो
कधी खुणेने जवळ बाहतो
कधी नाही ती भुलले गं बाई त्याच्या इशाऱ्याला

आज अचानक घरी तो आला
पैरण फेटा न पाठीस शेमला
फार गोड तो मजसी गमला
दिला बसाया पाट मी त्याला शेजाऱ्याला, माझ्या शेजाऱ्याला

घरात नव्हते तेव्हा बाबा
माझा मजवर कुठला ताबा
याची धिटाई तोबा तोबा
वितळू लागे ग लोणी बाई बघता निखाऱ्याला

त्याने आणिली अपुली गाडी
तयार जुंपून खिलार जोडी
मी ही ल्याले गं पिवळी साडी
वेड्यावानी जोडीनं गं गेलो आम्ही बाजाराला

येण्याआधी बाबा परतून
पोचणार मी घरात जाऊन
मग पुसतील काना पाहून
काय तेव्हा सांगू मी गं बाई त्याला बिचाऱ्याला